Wenn's anderscht schmeckt...

Im Augeblick, won i des schrib, vergöhn mir alli vor Hitz’. Aber wenn ihr des läset, wird d’ grossi Hitz umme si. Un dann isch scho bal de Tag do, irgend wenn im September, wo’s zum erschte Mol im Johr nümmi wie Summer schmeckt (für D.: riecht). Denn weiss i, dass wieder e Johr ummen isch. Viel dütlicher als am Altjohrsobend. Ihr do unte, im »Rheintalischen« (wie’s in Schlafes Bruder heisst), merke des weniger, oder nie. Bi Euch isch’s villicht so wit, wenn die erschti Wuche Dauernebel do isch…

Wenn’s also zum erschte Mol noch em Spötlig schmeckt, de Summer zum e spote Summer wird mit de erschte Spinnbuppe in de Luft, un d’ Arbet scho uf eim wartet, denn isch’s der Zit, z’überlege, was in de letschte 11 Monet alles so gsin isch. Mir hen säll nit numme im Chopf, mir trages au mit uns umme (nai, nit numme d’ Johresring). S’ isch äso, wie’s de Bode Kirchoff emol gschriibe het: »Aber das Herz ist kein Muskel, das Herz ist ein Sammler.« Wie recht er do dermit het, merkt me spöteschtens, wenn de Arzt zu eim sait: »Nervöse Herzbeschwerden«. Do sammle mir so mänks, won is am End us em Rhythmus bringt. Hen er e bitzeli Zit?

Denn fanget mol a un hirnet (für D.: das, was man mit dem Ge-hirn macht), do wird Euch öbbis vo dem ifalle, was es Herz schon lang gspürt. Bim Brueder Martin git’s e schöne Übersetzig vo Hebräer 13,9: »Es ist ein köstlich Ding, dass das Herz fest werde, welches geschieht durch Gnade.« I find, des isch e schön’s Bild, s’ Herz, wo fescht wird. Natürlig nit us Stei, aber so, dass es ruhig schlat, au wenn’s Läbe ganz anderscht isch. Säugling hen des gern, sie werde ruhig, wenn sie uf eim liege uns Herz schlage höre. Sell chenne si scho, scho nün Monet lang. S’sait ihne, dass es do e Verbindig git, wo trait. Wien e Bruck, wo mer cha drüber go, ohni Angscht, au wen mer nit sieht, wie’s ähne dra witer goht.

Euie Hellmuth Wolff, vo 900 Meter oben abe

zurück

Dankscheen vielmols für den scheene Impuls!

Willim (nicht überprüft) 08.09.2018 09:38 Uhr

Neuen Kommentar schreiben

Der Inhalt dieses Feldes wird nicht öffentlich zugänglich angezeigt.
bridge over the atlantic